ނޭޝަނަލް އިންޓެގްރިޓީ ކޮމިޝަނުގެ 9 ވަނަ އަހަރީ ދުވަސް ފާހަގަކުރުމުގެ ގޮތުން 2024 އޮކްޓޫބަރު 8 ވީ އަންގާރަދުވަހު ކޮމިޝަނުގައި ޚާއްޞަ ހަފްލާއެއް ބާއްވައިފި
ޝެއަރކުރުމަށް
ޝާއިޢުކުރި ތާރީޚް: 08 އޮކްޓޯބަރު 2024
ނޭޝަނަލް އިންޓެގްރިޓީ ކޮމިޝަނުގެ 9 ވަނަ އަހަރީ ދުވަސް ފާހަގަކުރުމުގެ ގޮތުން 2024 އޮކްޓޫބަރު 8 ވީ އަންގާރަދުވަހު ކޮމިޝަނުގައި ޚާއްޞަ ހަފްލާ އެއް ބާއްވައިފިއެވެ. ކޮމިޝަނުގެ އަހަރީ ދުވަހުގެ ގޮތުގައި ފާހަގަ ކުރަމުން އަންނަނީ ކޮންމެ އަހަރެއްގެ ވެސް އޮކްޓޫބަރު މަހުގެ 6 ވަނަ ދުވަހެވެ.
ކޮމިޝަނަށް 9 އަހަރު ފުރޭ އަހަރީ ދުވަހުގެ މުނާސަބަތުގައި ބޭއްވުނު ހަފްލާގައި، މުވައްޒަފުންނަށް ޚާއްސަކޮށްގެން ޕްރޮފެޝަނަލް ޑިވެލޮޕްމަންޓް ސެޝަންއެއް ކުރިޔަށް ގެންދިއުމުގެ އިތުރުން، ކޮމިޝަނުގައި އަލަށް ބޭނުންކުރަންފަށާ "ކޭސް މެނޭޖްމަންޓް ސޮފްޓްވެއަރ" އަދި "ވޮއިސް-ޓު-ޓެކްސްޓް" އެޕްލިކޭޝަން ބޭނުންކުރަން ފެށުން އިފްތިތާޙް ކުރެވިގެން ދިޔައެވެ.
މުވައްޒަފުންނަށް ހާއްޞަކޮށްގެން ހިންގުނު ޕްރޮފެޝަނަލް ޑިވެލޮޕްމަންޓް ސެޝަން "ޕްރޮމޯޓިންގ ޕޮޒިޓިވް މައިންޑްސެޓް" މި މައުޟޫއަށް ކުރިޔަށް ގެންގޮސްދީފައިވަނީ މައިންޑް ފީލްޑްސް އިންކް ގެ ޓްރެއިނަރ އަލްފާޟިލް މުޙައްމަދު މިސްޠޯޙްއެވެ.
"ކޭސް މެނޭޖްމަންޓް ސޮފްޓްވެއަރ" އަދި "ވޮއިސް-ޓު-ޓެކްސްޓް" އެޕްލިކޭޝަން އިފްތިތާޙްކޮށްދެއްވީ ކޮމިޝަނަށް އެންމެ ގިނަ ދުވަހު ޚިދުމަތްކުރެއްވި މެންބަރު ކާނަލް ރިޓަޔަރޑް އަޙުމަދު ޖިހާދެވެ. މި ހަފްލާގައި، ކޮމިޝަނުގެ ނައިބު ރައީސް ދެއްކެވި ވާހަކަފުޅުގައި އަލަށް ބޭނުންކުރަންފެށުނު ސޮފްޓްވެއަރތަކުގެ ސަބަބުން ކޮމިޝަނުގެ މަސައްކަތްތައް ހަރުދަނާކޮށް ހަލުއި ކުރުމަށާއި އާންމު ރައްޔިތުންނަށް ފޯރުކޮށްދޭ ޚިދުމަތުގެ ފެންވަރު މަތިކުރުމަށް ބާރުލިބިގެންދާނެކަން ފާހަގަކުރެއްވިއެވެ. އަދި ކޮމިޝަނުގެ މަސައްކަތުގައި މުވައްޒަފުންގެ ފަރާތުން ދޭ އެއްބާރުލުން ފާހަގަކޮށް މެންބަރުންގެ ނަމުގައި ކޮމިޝަނުގެ ހުރިހާ މުވައްޒަފުންނަށް ޝުކުރު އަދާކުރެއްވިއެވެ.